Í dag, 12. júní er alþjóðlegur dagur gegn barnaþrælkun (www.ilo.org) Það er því vel við hæfi að beina sjónum að þeim milljónum barna sem vinna langa vinnudaga við skelfilegar aðstæður. ABC barnahjálp starfar m.a. í Bangladess og Pakistan er þar er barnaþrælkun því miður afar algeng.
Í fátækustu löndum heims er eitt af hverjum fjórum börnum í barnaþrælkun. Barnaþrælkun samkvæmt þeim skýrslum sem hér er stuðst við frá UNICEF er þegar börn eru annað hvort of ung til að gegna þeim störfum sem þau eru sett í, eru hættuleg, stofna lífi þeirra, heilsu og limum í hættu, koma í veg fyrir að þau geti gengið í skóla og sinnt félagslegum þörfum sínum. (www.unicef.org). Af þeim 152 milljónum barna heimsin sem eru í þrælkun er rúmlega helmingur þeirra í hættulegri vinnu.
Í Bangladess er talið að þriðjungur barna á grunnskólaaldri sé ekki í skóla, að því er fram kemur í skýrslum UNICEF um stöðu barna í Bangladess. Þau börn eru mörg hver upptekin alla daga við vinnu. Allt frá fimm ára aldri stunda þau erfiðisvinnu sem oftar en ekki er hættuleg og heilsuspillandi.
Það sama er uppi á teningnum víða í Pakistan og verður hér sagt í stuttu máli frá nýtilkomnu samstarfi ABC og Rasta foundation of Pakistan.
Múrsteinabörnin í Pakistan
ABC hóf samstarf við frjálsu félagasamtökin Rasta Foundation of Pakistan árið 2018. Rasta hefur starfað í Pakistan frá árinu 2009 og markmið þeirra er að hjálpa múrsteinabörnunum, börnum sem áður voru í þrælavinnu í verksmiðjum þar sem brenndir eru múrsteinar, að öðlast menntun og frelsi en samtökin reka skóla.
Skólinn er í héraði sem heitir Sheikhupura, þar sem flestar fjölskyldur vinna fyrir verksmiðjueigendur sem þau skulda peninga. Þar fá börn kennslu í dagskóla frá leikskóla upp í 10. bekk. Læra þau úrdú, ensku, stærðfræði, ljóð og myndlist, félagsfræði, trúarbragðafræði, vísindi, landafræði, sögu og fá tölvukennslu. Í skólanum geta þau klárað ígildi gagnfræðaskólanáms og er námið bæði bóklegt og verklegt. Þessi börn eiga það sameiginlegt að hafa ekki fengið neina kennslu á nokkurn hátt áður en þau koma í Rasta skólann.
Rasta Foundation Brick Kiln Slaves School,var stofnaður árið 2009 en upphafsmaður starfsins er kristinn prestur að nafni Shamoun Chand. Chand ólst upp í nágrenni múrsteinaverksmiðjanna og sá þörfina hjá þessum afskipta hópi barna sem voru án réttar og menntunar. Chand byrjaði í litlu húsnæði með þrjá kennara. Árið 2013 komu sænsk samtök og byggðu nýja skólabyggingu fyrir samtökin og var byggingin vígð 28. nóvember 2013. Skólinn hefur vaxið jafnt og þétt og í dag eru þar yfir 200 nemendur og 18 kennarar og starfsmenn.
Mikið er lagt upp úr því að nemendur læri um og verði meðvitaðir um rétt sinn og skyldur í samfélaginu. Markvisst er stuðlað að fræðslu um grunnþarfir barna, barnavernd, barnaþrælkun, mansal, kynjajafnrétti og fleira. Félagsleg vandamál eru mörg í landinu og mikið níðst á þegnunum og réttindi þeirra virt að vettugi.
Flest börn byrja í KG eða forskóla 6 ára. Grunnskólinn er eins og á Íslandi frá 1. bekk upp í 10. bekk en þá taka nemendur samræmd próf og geta farið í háskóla ef þeir ná prófunum.
Vítahringurinn
Hinir bágstöddu eða þeir lægst settu í þjóðfélagsstiganum í Pakistan eiga ekki marga valmöguleika þegar kemur að því að sjá fyrir sér og sínum. Í raun má alla jafna tala um tvo valkosti; að betla á götunum eða þiggja lán frá þeim sem fara fyrir einhverjum stórum iðnaði í landinu, þar með töldum múrsteinaverksmiðjum. Þiggi þeir lán bíður þeirra langur og erfiður vinnudagur við að búa til múrsteina úr leir. Yfirleitt skín sólin skært á daginn og fyrir vikið verður leirinn mjög heitur og vinnumenn þurfa að bera múrsteina á milli með berum höndum. Í Sheikhupura héraðinu eru hundruð barna í þrælkunarvinnu og meðferðin á þeim svo slæm að þeim er ekki heimilt að sækja skóla. Vinnudagurinn er alla jafna 16 klukkustundir á dag sex daga vikunnar. Aðilar frá Rasta Foundation semja við verksmiðjueigendur og borga skuldir verkamannanna og leysa þar með börn þeirra úr ánauð (þrælkunarvinnu). Samtökin bjóða svo upp á dagskóla fyrir börnin þar sem þau fá menntun, mat, skólabúninga og heilsugæslu. Skólinn er í sama þorpi og verksmiðjurnar og þar sem fjölskyldur barnanna búa. Sumar fjölskyldur búa í litlum múrsteina-kofum og aðrar leigja eitt herbergi af verksmiðjueigendum fyrir alla fjölskylduna.
Óspillta kynslóðin og framtíðin
Það er samróma álit flestra að spilling sé helsta ástæða fátæktar í heiminum. Hugmyndafræðin um „óspillta kynslóð“ hefur verið innleidd víðs vegar í skólum ABC í Asíu og Afríku. Markvisst er farið í að fræða krakkana um neikvæðan áhrifamátt og umfang spillingar. Spilling snýst um bjagaðan hugsunarhátt frekar en sókn í peninga og munu komandi kynslóðir alast upp við fræðslu um þessa helstu ástæðu fátæktar og örbirgðar.
ILO, International Labour Organization, stendur fyrir alþjóðlegum degi gegn barnaþrælkun. Dagurinn var fyrst haldinn árið 2002 og í ár er dagurinn því haldinn í sextánda skipti. Mörgu hefur verið komið til leiðar síðan 2002 en eftir sem áður eru 152 milljónir barna í þrælkun. Markmiðið er að binda enda á barnaþrælkun fyrir árið 2025 og til að unnt sé að ná því markmiði er nauðsynlegt að allir leggist á eitt og vinni saman að því markmiði. Nánari upplýsingar um starf okkar á svæðinu er að finna á vefsíðu okkar www.abc.is.
